A investigadora do CiTIUS Paula López Martínez obtivo, a través da Área de Valorización, Transferencia e Emprendemento da USC, o primeiro título de propiedade industrial dunha topografía de semicondutores acadada por unha universidade española. A topografía de semicondutores, que garda o deseño dos circuítos integrados, serve neste caso  para protexer unha estrutura que emprega transistores tipo "donut" con xeometrías cadrada, hexagonal e octogonal para amplificadores de alta velocidade e que presentan maiores prestacións que os transistores de topoloxía convencional. 
O ámbito de aplicación deste tipo de transistores son os circuítos de alta velocidade e baixo consumo de potencia, que teñen a vantaxe de presentar unha inherente robustez fronte á radiación. Así, poderían usarse no deseño de compoñentes de sistemas de medicina nuclear ou de satélites, ambientes nos que a circuitería soporta grandes doses de radiación.
Paula López forma parte do Grupo de Visión Artificial do CiTIUS, que conta cunha ampla experiencia no deseño e fabricación de circuítos integrados para tarefas de visión artificial, tales como cámaras de alta velocidade e sistemas de videovixilancia.
Topografía de produtos semicondutores
Os títulos de protección de topografías de produtos semicondutores son a tipoloxía de propiedade industrial máis recente e refírese aos circuítos integrados electrónicos. O seu obxectivo é protexer o esquema de trazado das capas e elementos que compoñen o circuíto integrado, a súa disposición tridimensional e interconexións, é dicir, os elementos que constitúen a súa "topografía". 
Esta clase de propiedade industrial ten unha duración de dez anos a partir da fin do ano en que se rexistra a topografía ou se explota por primeira vez.